Lur arraroekiko mendekotasuna murrizteko imanak birziklatzea

Ceit Europako HARMONY proiektuaren buru da. Proiektu horren helburua Europatik kanpoko lur arraroekiko mendekotasunari (REE) irtenbidea ematea da, birziklatze-prozesu iraultzaile, ekologiko eta segurua garatuz.

Proiektuak irauten duen hiru urteetan, zortzi plan pilotu garatuko dira, bizitza baliagarriaren amaieran NdFeB motako iman iraunkorrak birziklatzeko dauden erronkei aurre egiteko.

Lur arraroak (REE) Europar Batasunerako funtsezko lehengaitzat hartzen diren arren, Txinarekiko mendekotasuna dago, batez ere NdFeB motako imanen ekoizpenean, aplikazio teknologiko ugaritan erabiltzen baitira, turbina eolikoak, gailu elektronikoak edo ibilgailu elektrikoak kasu.

Europak 16 mila tona lur arraro inportatzen ditu urtero Txinatik, hau da, eskariaren % 98; beraz, prezioen kontrolarekiko eta hornidurarekiko zaurgarritasuna funtsezko kezka bihurtu da Europako enpresentzat. Europako HARMONY proiektua, Ceit zentro teknologikoa buru duena, arazo horri konponbidea bilatzeko sortu da, eta NdFeB motako iman iraunkorrak bizitza baliagarriaren amaierara heltzear daudenean birziklatzeko sistema bat proposatu du. Ekimen hau guztiz erabakigarria da Europar Batasunaren menpekotasunarekin amaitzeko, eta arlo horretan jasangarritasuna lortzeko.

Gaur egun, NdFeB motako imanak (lur arraro kantitate handia dutenak) hondakin gisa baztertzen dira, eta ez dira berreskuratzen. HARMONY proiektuak iman horietatik abiatuta lur arraroetako elementuak birziklatzeko prozesu berritzaile, ekologiko eta seguru bat eskala pilotuan garatzea eta baliozkotzea proposatzen du.

Zortzi plan pilotuk emango diote forma proiektuari

Birziklatze-zirkuituan honako hauek sartuko dira: aparatu elektriko eta elektronikoen imanak eta hondakinak bildu eta desmuntatzea, zeharkako birziklatze-prozesuen bidez lur arraroak berreskuratzea, NdFeB birziklatuaren hautsa sortzea, hauts horretatik abiatuta imanak fabrikatzea eta horiek baliozkotzea. Prozesu horren eraginkortasuna eta bideragarritasuna bermatzeko, zortzi plan pilotu egingo dira, eta proiektua TRL 6-7aren inguruko heldutasun teknologikoko azken mailara igoko da.

HARMONY alderdi teknologikoetan zentratzeaz gain, prozesu horien bideragarritasun ekonomikoa, ingurumenekoa eta soziala ere kontuan hartzen ditu, bizi-zikloaren ebaluazio zorrotzen bidez. Gainera, erronka ez-teknologikoak jorratuko dira, hala nola gai ekonomikoak, etikoak eta normalizaziokoak, bai eta berrikuntza soziala ere, herritarren elkarrizketaren bidez.

Ceit-ekin batera, honako hauek dira partzuergoaren kideak: ERION, MEAB, KOLEKTOR Mobility, MAGNETI Ljublijana, MAGNAX, LANCOR, Copreci, Fraunhofer LBF, ESCI, Steinbeis Europa Zentrum, UNE, la Milango Unibertsitate Politeknikoa, Clausthal University of Technology, Freiberg University of Mining and Technology, Pforzheim University of Applied Sciences, Ganteko Unibertsitatea, Birminghameko Unibertsitatea, Florentziako Unibertsitatea, Euskal Herriko Unibertsitatea eta Mondragon Unibertsitatea.